2026 жылғы 26 шілдеде «The Astana Times» халықаралық басылымы Қазақстан Республикасының Президенті Қасым-Жомарт Тоқаевтың Омбы қаласында өткен XXII Қазақстан – Ресей өңіраралық ынтымақтастық форумына қатысуының қорытындыларына арналған материалды жариялады. Басылымда ССЗИ Басқарма Төрағасының орынбасары Манарбек Қабазиевтің екі елдің көлік-логистикалық ынтымақтастығының қазіргі даму тенденцияларына арналған сараптамалық түсініктемесі ұсынылды.
Мемлекет басшысы айтқан бастамаларға түсініктеме бере отырып, М. Қабазиев бүгінде Қазақстан мен Ресей өзара іс-қимылдың жаңа кезеңіне өтіп жатқанын, онда бәсекеге қабілеттіліктің негізгі факторы көлік инфрақұрылымын дамыту ғана емес, оның терең цифрлық трансформациясы болып табылатынын атап өтті. Оның айтуынша, цифрлық технологиялар халықаралық тасымалдардың тиімділігін арттыру, логистикалық шығындарды азайту және трансшекаралық сауданы жеделдету арқылы екі мемлекеттің тиімді географиялық орнын нақты экономикалық артықшылыққа айналдыруға мүмкіндік береді.
Сарапшы цифрлық логистика қазіргі заманғы еуразиялық көлік архитектурасын қалыптастырудың маңызды элементіне айналатынын атап өтті. Осыған байланысты цифрлық көлік дәліздерін құру, жүк ағындарын басқарудың зияткерлік жүйелерін енгізу, тасымалдарды болжау кезінде жасанды интеллектті пайдалану және пилотсыз көлік технологияларын кеңінен қолдану жөніндегі жобалар ерекше өзекті болып отыр. М. Қабазиевтің пікірінше, мұндай шешімдер халықаралық көлік маршруттарының тиімділігін едәуір арттырып, Қазақстанның Еуразияның жетекші транзиттік хабтарының бірі ретіндегі позициясын нығайта алады.
М. Қабазиев сондай-ақ Қазақстан мен Ресейдің көлік-логистикалық жүйелерінің цифрлық интеграциясын дамыту өзара сауданың одан әрі өсуіне, транзиттік ағындардың кеңеюіне және еуразиялық кеңістіктегі экономикалық өзара байланысты нығайтуға ықпал ететінін атап өтті. Оның пікірі бойынша, бұл халықаралық көлік дәліздерінің алдағы жылдардағы бәсекеге қабілеттілігін анықтайтын заманауи инфрақұрылым, цифрлық платформалар мен инновациялық технологиялардың үйлесімі.
Материалдың толық нұсқасымен «The Astana Times» сайтында танысуға болады: https://astanatimes.com/2026/07/kazakh-president-bets-on-digital-logistics-to-turn-geography-into-opportunity-at-omsk-forum/?fbclid=IwZnRzaATSosFwZG9mBWZkaWQWULSaBWvdPJL8xz6fvJZyb_oajC04t2V4dG4DYWVtAjExAHNydGMGYXBwX2lkCjY2Mjg1NjgzNzkAAR5MY_lE-aeUXpHhQrA1ai0s-dMqTSHvujk1vHi0FNwyqT2MkTjfpwAzH2faoA_aem_c9s-bYrOv5iLsWeAihobJg